Keer ons, Heer
as ons te ingenome raak met onsself;
as ons drome waar word, omdat ons te gewoon droom;
as ons aankom, omdat ons te ná aan die land, té veilig
gevaar het.

Keer ons, Heer
as die baie wat ons besit, ons dors na lewenswater les;
as ons, in liefde vir die hede, die ewige vergeet;
as ons, in ‘n poging om ‘n nuwe aarde te skep, die
visie van ‘n hemel laat verdof.

Help ons, Heer
om groter te durf droom, om wyer seë te verken,
om ons sig van land te verloor, sodat ons die sterre kan
sien.

Verskuif ons horison, verhoog ons hoop en stuur ons met moed en mededoë U toekoms in.

In die naam van Jesus Christus.
Amen.

Vrye vertaling: Marie de Kock

The post Gebed van ‘n seeman appeared first on Kruiskerk.

Elke afdraai paadjie ken ek.
Elke keer het ek verdwaal.
Elke keer het U my iewers kom haal.
Maak dit Heer, die laaste maal.

Elke dag is ‘n gedagte.
Elke kamer net gehuur.
Elke aardse droom van rykdom en roem,
net ‘n skadu teen die muur.

Wat ek is, is net genade.
Wat ek het, is net geleen.
Eintlik smag ek na U waters van rus.
Lei my, Heer, vanaand daarheen.

Koos du Plessis

The post Gebed – Koos du Plessis appeared first on Kruiskerk.

Gebed van emeritus-aartsbiskop Desmond Tutu by die inhuldiging van oud-president Nelson Mandela in 1994

Naude, P., 2008. Die groot gebedeboek. Lux Verbi.

The post Seën ons land appeared first on Kruiskerk.

Dat ons leef omdat U leef is die eerste
van alles wat wonderlik is.
’n Wisselvloei is daar tussen U en ons.
U vloei in ons in en ons in U, en in U word
ons arme vog gesuiwer en vernuwe,
en ons self keer uit U terug in ons in
deur die membraan wat tyd en wêreld is.
Membraan of illusie, so dun is dit, so nie,
so nêrens vir u begenadigdes —
dankie dat ons wat onsself versteek vir ons naastes
gans oop is vir U en U oop.
Dankie vir die gladder as asemhaling heen en weer
tussen U en ons; dat tyd en ewigheid
mekaar deurdring, nie twee is nie maar een.
Dankie God, vir dié wonder, waarin die harde seer
wat wêreld is, sagter as asem oplos en verdwyn.

Cussons, S., 1984. Membraan. Kaapstad: Tafelberg.

The post Gebed vir dié in die wêreld appeared first on Kruiskerk.

Wees vol moed, behou die goeie
en vergeld nie kwaad met kwaad nie.

Ondersteun die wankelmoedige, skraag die swakkere
en vertroos die bedroefde. Wees lankmoedig met almal
en bestry verdrukking.

Eer en dien die Here
en verbly julle in die krag van die Heilige Gees.
Die seën van God die Almagtige, die Vader, die Seun
en die Heilige Gees, is en bly met julle.

Afrikaanse verwerking: Marie de Kock

The post Seëngebed appeared first on Kruiskerk.