Kruiskerk

Ou Ierse seëngebed

Admin — Sun, 07 Jul 2019 10:28:20 +0000

Mag jou pad gelyk en reguit loop,
‘n bries teen jou rug, jou hart vol hoop.
Mag die son jou siel verbly,
die reën sag sif oor jou land.
En, tot ons weer ontmoet,
hou God jou in Sy hand.

Afrikaanse verwerking: Marie de Kock

The post Ou Ierse seëngebed appeared first on Kruiskerk.

Stadige dood

Admin — Tue, 24 Apr 2018 19:45:09 +0000

‘n Mens wat ‘n slaaf van gewoonte geword het,
wat elke dag dieselfde pad stap,
nooit die pas versnel of iets nuuts waag nie,
nie ‘n eie mening het of dinge ten volle ervaar nie …
hy sterf ‘n stadige dood.

Hy wat geesdrif vermy, alles swart op wit wil hê,
gevoelens wat die oë laat glinster en die hart laat bons, versmaai, nie kan lag oor menslike foute nie …
hy sterf stadig.

Hy … of sy …
wat nie van ’n probleem ‘n uitdaging kan maak nie,
halfpad tou opgooi, nie vrae vra om meer te weet nie,
nooit die sekerheid vir die onsekere verruil om ‘n droom te volg nie …
hy sterf stadig.

Hy wat nie reis nie, nie lees nie, nie luister nie,
wie se arbeid nie sy hart verbly nie,
wat nie vrede het of goedheid in homself vind nie …
hy sterf stadig.

Hy wat sy eie vertroue vernietig, nie hulp kan aanvaar nie,
oor alles pieker en kla, die reën wat nie ophou of die son wat nie skyn nie …
hy sterf stadig.

Om waarlik te leef, is veel meer as asemhaal …
dis om vurig en hartstogtelik mens te wees.

Pablo Neruda: Die Slowly – Selected Poems

Afrikaanse verwerking: Marie de Kock

The post Stadige dood appeared first on Kruiskerk.

Gebed van ‘n seeman

Admin — Wed, 12 Apr 2017 07:17:14 +0000

deur Francis Drake

Keer ons, Heer
as ons te ingenome raak met onsself;
as ons drome waar word, omdat ons te gewoon droom;
as ons aankom, omdat ons te ná aan die land, té veilig
gevaar het.

Keer ons, Heer
as die baie wat ons besit, ons dors na lewenswater les;
as ons, in liefde vir die hede, die ewige vergeet;
as ons, in ‘n poging om ‘n nuwe aarde te skep, die
visie van ‘n hemel laat verdof.

Help ons, Heer
om groter te durf droom, om wyer seë te verken,
om ons sig van land te verloor, sodat ons die sterre kan
sien.

Verskuif ons horison, verhoog ons hoop en stuur ons met moed en mededoë U toekoms in.

In die naam van Jesus Christus.
Amen.

Vrye vertaling: Marie de Kock

The post Gebed van ‘n seeman appeared first on Kruiskerk.

Vlug en aankoms

Admin — Mon, 23 Jan 2017 12:01:34 +0000

Dit is genoeg om te gelewe het, een maal, een maal in eenmaligheid van chromosome wel te bestaan het van kroon tot toon. Genoeg om te gelewe het, vol ontsluit, ook net een maal, genoeg om dalk vreedsaam in ‘n stille bemoeiing met eenmaligheid van doodgaan dalk te kan dink: ek was eenmaal eenmaal was … Continue reading Vlug en aankoms →

The post Vlug en aankoms appeared first on Kruiskerk.

Gebed – Koos du Plessis

Admin — Sun, 18 Jan 2015 12:59:14 +0000

Laat my nooit die grond verlaat nie.
Laat my in U skadu bly.
Gee dat elke aardse vreugde en vrees
eindelik nietig word vir my.

Elke afdraai paadjie ken ek.
Elke keer het ek verdwaal.
Elke keer het U my iewers kom haal.
Maak dit Heer, die laaste maal.

Elke dag is ‘n gedagte.
Elke kamer net gehuur.
Elke aardse droom van rykdom en roem,
net ‘n skadu teen die muur.

Wat ek is, is net genade.
Wat ek het, is net geleen.
Eintlik smag ek na U waters van rus.
Lei my, Heer, vanaand daarheen.

Koos du Plessis

The post Gebed – Koos du Plessis appeared first on Kruiskerk.